Eze 11 | NdeIBE | STEP | Lapho-ke uMoya wangiphakamisela phezulu wangisa esangweni lendlu kaJehova elikhangele empumalanga. Khonapho ekungeneni kwesango kwakulamadoda angamatshumi amabili lanhlanu, njalo phakathi kwawo ngabona uJahazaniya indodana ka-Azuri kanye loPhalathiya indodana kaBhenayiya, abakhokheli babantu.

Ezekiel 11

Ukwahlulelwa Kwabakhokheli Bako-Israyeli

1 Lapho-ke uMoya wangiphakamisela phezulu wangisa esangweni lendlu kaJehova elikhangele empumalanga. Khonapho ekungeneni kwesango kwakulamadoda angamatshumi amabili lanhlanu, njalo phakathi kwawo ngabona uJahazaniya indodana ka-Azuri kanye loPhalathiya indodana kaBhenayiya, abakhokheli babantu. 2 UJehova wathi kimi, “Ndodana yomuntu, laba yibo abantu abenza amacebo amabi, benika lezeluleko ezimbi kulelidolobho. 3 Bathi, ‘Masinyane nje akuyikuba yiso na isikhathi sokwakha izindlu? Idolobho leli liyimbiza yokupheka, njalo thina siyinyama.’ 4 Ngakho-ke phrofetha okubi ngabo; phrofetha ndodana yomuntu.”

5 Lapho-ke uMoya kaJehova weza kimi wangitshela ukuba ngithi, “Nanku okutshiwo nguJehova: Lokho yikho wena okutshoyo, wena ndlu ka-Israyeli, kodwa mina ngiyakwazi okusengqondweni yakho. 6 Sewabulala abantu abanengi phakathi kwedolobho leli wagcwalisa imigwaqo yalo ngabafileyo.

7 “Ngakho-ke nanku okutshiwo nguJehova Wobukhosi: Izidumbu oziphosele lapho ziyinyama njalo idolobho leli liyimbiza, kodwa wena ngizakuxotshela ngaphandle kwalo.

8 Inkemba uyayesaba, njalo inkemba yiyo engizayiletha ukuba imelane lawe, kutsho uJehova Wobukhosi. 9 Ngizakuxotshela ngaphandle kwedolobho ngikunikele kwabezizweni ngiphinde ngikujezise. 10 Uzabulawa ngenkemba, njalo ngizakwahlulela emingceleni yako-Israyeli. Lapho-ke uzakwazi ukuthi mina nginguJehova. 11 Idolobho leli kaliyikuba yimbiza yakho, kumbe wena ube yinyama phakathi kwalo; ngizakwahlulela emingceleni yako-Israyeli. 12 Njalo uzakwazi ukuthi mina nginguJehova, ngoba izimiso zami kawuzilandelanga kumbe wagcina imithetho yami kodwa ulandele izenzo zezizwe ezikuhanqileyo.”

13 Kwathi lapho ngisaphrofetha, uPhelathiya indodana kaBhenayiya wafa. Ngakho ngathi mbo phansi ngobuso ngakhala ngelizwi eliphezulu ngisithi, “Awu, Jehova Wobukhosi! Uzaqothula insalela ka-Israyeli na?”

14 Ilizwi likaJehova lafika kimi lisithi:

15 “Ndodana yomuntu, abafowenu – abafowenu abayizihlobo zakho zegazi kanye lendlu yonke ka-Israyeli – yibo labo abantu baseJerusalema abathe ngabo: ‘Bakhatshana kakhulu kukaJehova; ilizwe leli saliphiwa ukuba libe yilifa lethu.’

Ukubuyela Kuka-Israyeli Kuyathenjiswa

16 “Ngakho-ke wothi: ‘Nanku okutshiwo nguJehova Wobukhosi: Lanxa ngabasa khatshana phakathi kwezizwe njalo ngabahlakazela phakathi kwamazwe, ikanti okwesikhatshana ngibe yindlu engcwele kubo emazweni abaye kuwo.’

17 “Ngakho-ke wothi: ‘Nanku okutshiwo nguJehova Wobukhosi: Ngizakubutha ezizweni ngikubuyise ngikususa emazweni owawuhlakazekele kuwo, njalo ngizakunika ilizwe lako-Israyeli futhi.’

18 “Bazabuyela kulo basuse zonke izifanekiso zalo ezihlazisayo kanye lezithombe ezenyanyekayo. 19 Ngizabanika inhliziyo engehlukananga ngifake lomoya omutsha phakathi kwabo; ngizasusa kubo inhliziyo yabo yelitshe ngibaphe inhliziyo yenyama. 20 Laphoke bazalandela izimiso zami baqaphele ukugcina imithetho yami. Bazakuba ngabantu bami, lami ngizakuba nguNkulunkulu wabo.

21 Kodwa labo abazinhliziyo zabo zinikelwe ezifanekisweni zabo ezihlazisayo lasezithombeni ezenyanyekayo, lokhu abakwenzileyo ngizakwehlisela phezu kwamakhanda abo, kutsho uJehova Wobukhosi.”

22 Lapho-ke amakherubhi, ayelamavili emaceleni, elula izimpiko zawo, njalo inkazimulo kaNkulunkulu ka-Israyeli yayingaphezu kwawo. 23 Inkazimulo kaJehova yaya phezulu isuka phakathi kwedolobho yayakuma ngaphezu kwentaba ngasempumalanga kwedolobho.

24 UMoya wangiphakamisela phezulu wangisa kwabathunjiweyo eBhabhiloni ngombono owawulethwe nguMoya kaNkulunkulu. Emva kwalokho umbono engangiwubonile wasuka kimi, 25 ngasengitshela abathunjiweyo konke uJehova ayengitshengise khona.